Parlamentuaren osoko bilkurak ebazpen bat onetsi du gaur UPNren, PSNren, EH Bilduren, Geroa Bairen, PPNren eta Contigo-Zurekinen aldeko botoekin eta Voxen aurkakoarekin, zeinaren bidez Nafarroako Gobernua premiatzen baita “LGTBIfobiaren aurkako Foru Behatoki bat sor dezan bi urteko epean, zeina txertatuko baita administrazio publikoetan eskueran dauden baliabideen artean eta horiekiko koherentziaz. Horren sorkuntza partaidetzazkoa eta diziplinartekoa izanen da". 

Behin betiko testua EH Bilduk, Geroa Baik eta Contigo-Zurekin taldeak sinatutako eta PSNk, ekimenaren titularrak, onartutako aldezteko zuzenketa baten emaitza da.
 

Zioen azalpenean, PSN talde parlamentarioak sustatutako ebazpenak LGTBI pertsonen aurkako indarkeria, diskriminazio eta bazterkeria ekintzen "igoera kezkagarria" eta Oinarrizko Eskubideen Europako Agentziaren arabera ia salatzen ez diren gorroto eta diskriminazio gertakariak erregistratzeko, aztertzeko eta horiei modu eraginkorrean erantzuteko tresnarik eza kontrajartzen ditu.

Proposamena egin duenaren ustez, nahikoa arrazoi dira behatoki baten sorrera justifikatzeko, "zaintza-mekanismo gisa eta, aldi berean, aniztasunarekiko errespetua sustatzen duten politika inklusiboak sustatzeko plataforma gisa" jardungo lukeena.

Funtsean, eta adierazten denaren arabera, "kultura-aldaketa" baten oinarriak ezarri nahi dira, "aniztasuna errespetatzea, identitateagatiko, genero-adierazpenagatiko edo sexu-orientazioagatiko diskriminazioa, indarkeria eta bazterketa ezabatuko dituen hezkuntza" oinarri hartuta.

• www.nafarroakoparlamentua.eus
• Mozioa (61. NPAO, 2024-04-30ekoa)